എൽ .ഇ.ഡി ബൾബുകൾ

 ഒരു എല്‍ ഇ ഡി ബള്‍ബ് വാങ്ങിച്ചു. 12W, 1200Lumen. പണ്ടു വാങ്ങിച്ചിരുന്ന ചൈന എല്‍ ഇ ഡിയും ഇതും തമ്മിലുള്ള വ്യത്യാസം മനസ്സിലാവുന്നത് ഇത് പ്രകാശിപ്പിച്ചുനോക്കുമ്പോഴാണ്. 20W ന്റെ സി എഫ് എല്ലിനേക്കാള്‍ പ്രകാശം! അങ്ങനെയാണ് ചെറിയൊരു തിരച്ചില്‍ ഈ വിഷയത്തില്‍ നടത്തിയത്.

എല്‍ ഇ ഡി ബള്‍ബു വാങ്ങുമ്പോള്‍ ചില കാര്യങ്ങള്‍ ശ്രദ്ധിക്കേണ്ടതുണ്ട്.
വാട്ടേജ് നോക്കി എല്‍ ഇ ഡി വാങ്ങുന്നതില്‍ വലിയ അര്‍ത്ഥമില്ല. പ്രകാശത്തിന്റെ കാര്യത്തില്‍ നോക്കേണ്ടത് എത്ര ലൂമന്‍ ലഭിക്കും എന്നതു തന്നെയാണ്. എവറഡി, ഫിലിപ്സ്, ഹാവല്‍സ്, വിപ്രോ പോലുള്ള കമ്പനികളുടെ എല്‍ ഇ ഡികള്‍ മിക്കതും ഒരു വാട്ടിന് 100ലൂമന്‍ പ്രകാശം തരുന്നവയാണ്. സി എഫ് എല്‍ പോലും ഒരു വാട്ടിന് 80ലൂമനോളം പ്രകാശമേ നല്‍കുന്നുള്ളൂ. ചൈനീസ് എല്‍ ഇ ഡി ബള്‍ബുകള്‍ പരാജയപ്പെടുന്നത് ഇവിടെയാണ്. അത്തരം റേറ്റിങുകള്‍ അത്തരം എല്‍ ഇ ഡികളുടെ കവറില്‍പ്പോലും ഉണ്ടാവില്ല. വില കുറവാണെന്നതുപോലെ തന്നെ പ്രകാശവും കുറവാണ്.
മറ്റൊരു പ്രധാനപ്പെട്ട കാര്യമാണ് CRI എന്ന Color Rendering Index. വസ്തുക്കളുടെ നിറം എത്ര നന്നായി കാണിക്കാന്‍ വെളിച്ചത്തിനു കഴിയുന്നു എന്ന സൂചകമാണിത്. CRI 100 ആണെങ്കില്‍ ഏറ്റവും മികച്ചത്. പക്ഷേ ദൗര്‍ഭാഗ്യവശാല്‍ നമുക്കു കിട്ടുന്ന മിക്ക എല്‍ ഇ ഡികളും CRI വളരെ താഴെയാണ്, പ്രത്യേകിച്ചും ചൈനീസ് എല്‍ ഇ ‍ഡികള്‍. CRI 80ല്‍ താഴെയുള്ള എല്‍ ഇ ഡി ബള്‍ബുകള്‍ നാം ഉദ്ദേശിച്ച ഫലം നല്‍കില്ല. 80നു മുകളിലുള്ളത് പെട്ടെന്നു കിട്ടാനുമില്ല. മിക്കവരും CRI 80 തന്നെയാണ് റേറ്റിങ് നല്‍കിയിരിക്കുന്നത്. ചുരുങ്ങിയത് ഇത്രയെങ്കിലും CRI ഉള്ള എല്‍ ഇ ഡി ബള്‍ബുകള്‍തന്നെ വാങ്ങാന്‍ പ്രത്യേകം ശ്രദ്ധിക്കണം.
കളര്‍ടെംപറേച്ചറും പ്രധാനമാണ്. ഇത് കെല്‍വിനിലാണ് പറയാറ്. പഴയ ഇന്‍കാന്‍ഡസന്റ് ബള്‍ബുകള്‍ ഒരു തരം മഞ്ഞവെളിച്ചം നല്‍കുന്നവയായിരുന്നു. അതേ തരത്തില്‍ പ്രകാശം നല്‍കുന്ന എല്‍ ഇ ഡികളും ലഭ്യമാണ്. റ്റ്യൂബ്‍ലൈറ്റുപോലെ പകല്‍വെളിച്ചം നല്‍കുന്ന എല്‍ ഇ ഡികളും ലഭ്യമാണ്. പകല്‍വെളിച്ചത്തോട് അടുത്തുനില്‍ക്കുന്ന വെളിച്ചം വേണമെങ്കില്‍ 5500K യോ അതിനു മുകളിലോ കളര്‍ടെംപറേച്ചര്‍ ഉള്ളവ തിരഞ്ഞെടുക്കണം. 6500K ലൈറ്റുകള്‍ ധാരാളമായി ലഭ്യമാണ്.
ഇതല്ലാതെ പവര്‍ ഫാക്ടര്‍ ഉള്‍പ്പടെ മറ്റുപല കാര്യങ്ങളും ശ്രദ്ധിക്കേണ്ടതായിട്ടുണ്ട്. അറിയാവുന്നവര്‍ വിവരം പങ്കുവയ്ക്കൂ.
വാല്‍ക്കഷണങ്ങള്‍.. അധികവിവരങ്ങള്‍
--------------------------
*നാനോലൈറ്റ് എന്ന കമ്പനി 133ലൂമന്‍/വാട്ട് എന്ന നിലയിലുള്ള എല്‍ഇഡി ബള്‍ബുകള്‍ നിര്‍മ്മിക്കുന്നു എന്ന അവകാശവാദം ഉന്നയിച്ചിട്ടുണ്ട്.
*പിന്നെ ശ്രദ്ധിക്കേണ്ട മറ്റൊരു കാര്യം ഒരു മുറിയില്‍ത്തന്നെ ഒന്നിലധികം എല്‍ ഇ ഡി ബള്‍ബുകള്‍ ഉപയോഗിക്കേണ്ടി വരുമ്പോഴാണ്. ഒരേ കളര്‍ടെംപറേച്ചറും CRI റേറ്റിങും ഉള്ള എല്‍ ഇ ഡികള്‍ തന്നെ തിരഞ്ഞെടുക്കാന്‍ പ്രത്യേകം ശ്രദ്ധിക്കണം. അല്ലെങ്കില്‍ ഉദ്ദേശിച്ച ഫലം ലഭിക്കില്ല. ഒരു ഇന്‍കാന്‍ഡസന്റ് ബള്‍ബും റ്റ്യൂബ്‍ലൈറ്റും ഒരു മുറിയില്‍ ഒരുമിച്ചുപയോഗിച്ചാല്‍ ഉണ്ടാകുന്ന അസ്വസ്ഥത ഇവിടെയും ഉണ്ടാകും