മുട്ടത്തോടിനെ മികച്ച ജൈവവളമാക്കാം......
മുട്ടത്തോടിനെ അടുക്കളത്തോട്ടത്തില് വളമായി ഉപയോഗിക്കുന്ന വിധം പല തവണ ചര്ച്ച ചെയ്തതാണ്. പല വിധത്തില് മുട്ടത്തോടിനെ നമുക്ക് വളമായി ഉപയോഗിക്കാം. പൊടിച്ചും നേരിട്ടും മുട്ടത്തോട് പച്ചക്കറി തടത്തിലിട്ടു കൊടുക്കുന്നവരുണ്ട്. മുട്ടത്തോടിന്റെ ഗുണങ്ങളും ഇത് ഉപയോഗിക്കേണ്ട രീതികളും മനസിലാക്കൂ.
പൊടി രൂപത്തില്
മുട്ടത്തോട് കൈകൊണ്ട് പൊടിച്ച് ഗ്രോബാഗിലും ചെടിച്ചട്ടിയിലും ഇട്ടു കൊടുക്കകയാണ് മിക്കവരും ചെയ്യുന്നത്. എന്നാല് ഇതിലും ഫലപ്രദമായ മാര്ഗമാണ് പൊടിയായി ഉപയോഗിക്കുന്നത്. നല്ലൊരു ജൈവകീടനാശിനിയായും ഇതിലൂടെ മുട്ടത്തോട് മാറും. നന്നായി കഴുകി ഉണക്കുകയാണ് ആദ്യം വേണ്ടത്. ഈര്പ്പം പോയിക്കഴിഞ്ഞാല് കൈ കൊണ്ട് തോടുകള് പൊടിക്കുക. ഇവ പിന്നീട് മിക്സിയിലിട്ടു പൊടിക്കുക. അപ്പോള് ധാരാളം പൊടി ലഭിക്കും, ഇതു കുറെയധികം ചെടികള്ക്ക് ഉപയോഗിക്കാന് സാധിക്കും.
മണ്ണിന്റെ അമ്ലത കുറയ്ക്കാന്
ഗ്രോബാഗിലും മറ്റും മിശ്രിതം നിറയ്ക്കുമ്പോള് മണ്ണിന്റെ അമ്ലത കുറയ്ക്കാന് കുമ്മായം നമ്മള് ഉപയോഗിക്കാറുണ്ട്. ഇതിനു പകരം മുട്ടത്തോട് പൊടി ചേര്ത്താലും മതി. കുമ്മായത്തില് അടങ്ങിയിരിക്കുന്ന കാല്സ്യം കാര്ബണേറ്റാണ് മുട്ടത്തോടില് 90 ശതമാനത്തോളമുള്ളത്. നിരവധി ധാതുക്കളും ഇതിലുണ്ട്. മണ്ണിന്റെ അമ്ലത കുറച്ച് ഫലഭൂയിഷ്ടമാക്കാന് മുട്ടത്തോട് പൊടി ചേര്ക്കുന്നത് സഹായിക്കും.
കായ്ഫലം കൂട്ടാന്
പച്ചമുളക്, തക്കാളി, വഴുതന എന്നിവ ചിലപ്പോള് കായ് പിടിക്കാതെ മുരടിച്ചു നില്ക്കുന്നതു കാണാം. ഇതിനു പരിഹാരമായി മുട്ടത്തോട് പൊടിച്ചത് ഉപയോഗിക്കാം. ഗ്രോബാഗിലെ ചെടികള് ഒന്നു കോതി ഒതുക്കിയ ശേഷം മുട്ടത്തോട് പൊടി തടത്തിലിട്ടു കൊടുക്കുക. ചെടികള് ആരോഗ്യത്തോടെ വളരുകയും കായ്കള് നന്നായി ഉണ്ടാകുകയും ചെയ്യും.
കീടങ്ങളെ തുരത്താന്
ഒച്ച്, വണ്ടുകള്, പുഴുക്കള് എന്നിവ ഗ്രോബാഗില് വലിയ ശല്യമായി മാറാറുണ്ട്. ഇവയെ തുരത്താന് മുട്ടത്തോട് പൊടിച്ചത് ഉപയോഗിക്കാം. ഇലകളിലും തണ്ടിലും മുട്ടത്തോട് പൊടി വിതറിയാല് ഒച്ചും വണ്ടുകളും നാടുവിടും.
No comments:
Post a Comment